FC Valur Woman

JEY JEY JEY JEY JEY!!!

Í gærkvöldi sigruðum við nýliðana í landsbankadeildinni 6-0. Leikurinn var spilaður í sól og smá golu en það var samt frekar kalt í veðri. Við byrjuðum leikinn að krafti og sóttum stíft en náðum þó ekki að skora strax. Fyrsta mark leiksins kom eftir að Ásta Árna átti fína sendingu á Margréti sem var ein á auðum sjó fyrir framan markvörð ÍR-inga og lyfti boltanum skemmtilega yfir hana og staðan var orðin 1-0 okkur í hag. Annað mark leiksins var stórglæsilegt. Við fengum hornsyrnu og ÍR-ingar voru mjög lengi að skipuleggja sig. Margrét tók spyrnuna og sendi stutt á Guðný og fékk hann tilbaka og smellti boltanum uppí samskeytin fjær, virkilega glæsilegt skot og staðan orðin 2-0! Þriðja mark leiksins kom eftir hreint frábært spil. Dóra María vann boltann og sendi hann á Guðný sem átti frábæra sendingu á Vönju sem keyrði upp kantinn og renndi boltanum út á Margréti sem kláraði færið og staðan því orðin 3-0 og Margrét komin með þrennu!!
ÍR átti eitt gott færi í fyrri hálfleik þegar þær áttu mjög gott sláar skot en fleiri færi fengu þær ekki.
Staðan var 3-0 í hálfleik og Beta gerði eina breytingu á liðinu Nína kom inná fyrir Kötu fyrirliða en hún er tæp í læri.
Í seinni hálfleik stimplaði Nína sig inní leikinn þegar hún skoraði eftir góða stungu frá Dóru Maríu. Dóra María var öll í stoðsendingunum en hún átti frábæra sendingu á Rakel sem komst ein inn fyrir hægra megin og skoraði með snöggu skoti á nærstöng og staðan orðin 5-0. Eftir þetta skiptu ÍR-ingar um markvörð en okkur til dálitlar undrunar fór markvörður liðsins í bakvörð og einhvers konar færsla varð á liðinu – þetta ferli tók um 5 mínútur. Það kom ekki að sök því Vanja skoraði sjötta og síðasta mark okkar eftir hræðileg mistök í vörn ÍR-inga eftir að Guðný átti fína fyrirgjöf fyrir markið. 6-0 sigur því staðreynd.
ÍR stúlkur eiga samt hrós skilið en það sást að þær voru virkilega að reyna að spila boltanum og er greinilegt að þær eru með mun betra lið núna en þær telfdu fram í vetur. Þær fengu eitt dauðafæri í lok leiksins þegar þær áttu skalla sem fór naumlega yfir markið.
Fínn leikur að okkar hálfu en samt klúðruðum við alltof mörgum færum í seinni hálfleik þar sem við hreinlega óðum í færum. Margrét stóð sig vel með þrjú mörk en hefði hæglega getað sett þónokkur í viðbót, Dóra María var dugleg á miðjunni að leggja upp mörk og færi fyrir félaga sína. Sif átti fínan leik og var sívinnandi og Fríða var dugleg í “skítavinnunni” og hélt boltanum vel. Pála átti aftur góðan leik í vörninni en hún vann virkilega marga bolta bæði í loftinu og í tæklingum. Allar þrjár skiptingarnar í gær höfðu góð áhrif á leik liðsins en Hallbera, Nína og Anna áttu allar fínar innkomur! Það má því segja að liðsheildin hafi verið allsráðandi í gær enda var sigrinum fagnað með stæl seinna um kvöldið.
Nú kemur smá pása á leikjum þar sem landsliðið er að fara til Grikklands en næsti leikur okkar í deildinni er ekki fyr en 8.júní.
Liðið: Gugga, Ásta (Anna), Pála, Guðný, Sif, Fríða, Kata (Nína 46.), Dóra María, Rakel (Hallbera), Vanja og Margrét Lára.

Sigurður Ragnar Eyjólfsson, landsliðsþjálfari, tilkynnti í dag landsliðshóp sinn sem mætir Grikkjum ytra 31. maí næstkomandi. Þetta er fyrsti leikur liðsins í undankeppni fyrir EM 2009.
Þóra Helgadóttir gefur ekki kost á sér í þennan leik vegna vinnu sinnar en systir hennar, Ásthildur Helgadóttir, kemur að nýju inn í hópinn eftir meiðsli.

Í kvöld sigruðum við Stjörnuna með fimm mörkum gegn einu. Aðstæður til knattspyrnuiðkunar voru mjög breytilegar. Strax í upphitun byrjaði að snjóa og síðan hvessti allsvakalega. Þegar leikurinn byrjaði síðan var hætt að snjóa og komið sólskyn og nánast logn.
Fyrsta mark leiksins kom á 13.mínútu en Sandra markvörður stjörnunnar átti útspark sem við unnum og boltinn fór á Rakel sem átti frábæra sendingu á Margréti Láru sem slapp ein inn fyrir og sólaði Söndru og renndi boltanum í netið. Eftir markið réðum við algjörlega gangi leiksins og sköpuðum okkur fullt af færum sem við náðum þó ekki að nýta og staðan var ennþá 1-0 í hálfleik. Rakeli var skipt útaf á 27.mínútu vegna meiðsla og hennar í stað kom Nína Ósk en hún átti heldur betur eftir að láta til sín taka.
Fyrri hálfleikurinn einkenndis dálítið af því að það vantaði ávallt herslumuninn í að klára sóknirnar almennilega en það var virkilega erfitt að koma boltanum fyrir sig þar sem boltinn var bókstaflega “all over the place” á rennblautum og ósléttum vellinum.
Strax í byrjun seinni hálfleiks á 48.mínútu fengum við heldur betur vatnsgusu í andlitið en dómarinn ákvað á einhvern óskiljanlegan hátt að reyna að jafna leikinn og gefa Stjörnunni vítaspyrnu. Við viljum meina að ekki hafi leikmaður Stjörnunnar einungis verið rangstæður heldur líka bókstaflega ekkert að því hvernig Fríða tæklaði boltann í horn, en vítaspyrna var niðurstaðan. Harpa Þorsteinsdóttir fór á vítapunktinn og skoraði úr spyrnunni og staðan orðin 1-1. Þetta hleypti auknu lífi í leikinn og Stjarnan komst aðeins betur inní leikinn. En það var þó á 58.mínútu sem að Margrét skoraði sitt annað mark eftir að hún fékk sendingu frá vinstri, snéri laglega á varnarmann Stjörnunnar og setti boltann í fjærhornið. Einkar laglegt mark og staðan orðin 2-1. Stuttu síðar opnaði Nína Ósk markareikning sinn í sumar með góðu marki eftir klafs í teig Stjörnunnar. Staðan orðin 3-1 og þá var komið að þætti dómarans í annað sinn. Við áttum hornspyrnu frá hægri og lítið sem ekkert virtist vera í gangi í teignum en dómarinn flautaði í flautu sína og benti á vítapunktinn. Svo virtist vera sem að hann væri að “leiðrétta” vítið sem hann gaf Stjörnunni fyrr í leiknum. Sumar vildu meina að boltinn hafi farið í hendina í leikmanni Stjörnunnar en það var þá allavega ekkert áberandi. Margrét Lára fór á vítapunktinn og skoraði örugglega og staðan því orðin 4-1 og sigurinn orðin ljós. Dóra María kláraði þetta svo fyrir okkur með fallegasta marki leiksins en hún fékk langa sendingu sem hún tók á kassann og smellti honum með vinstri uppí þaknetið og lokatölur leiksins urðu 5-1. Hallbera og Linda fóru inná fyrir Guðný og Sif í seinni hálfleik.
Gríðarlega mikilvægur sigur í höfn og mikill léttir að vera komin með 3 stig eftir fyrstu umferð. Pála átti mjög góðan leik í vörninni og langt síðan maður hefur séð eins margar góðar tæklingar í sama leiknum, sóknarmenn Stjörnunnar réðu ekkert við hana. Margrét, Nína og Dóra María kláruðu þetta síðan fyrir okkur sóknarlega en í heild sinni stóð liðið sig nokkuð vel en fyrsti klukkutími leiksins bar með sér mikinn vorbragðskeim. Við hefðum klárlega getað bætt við mörkum en engu að síður settum við 5 stykki gegn einu marki stjörnunnar sem verður að teljast virkilega góður sigur.
Núna erum við komnar með fyrstu 3 stigin í hús og Íslandsmótið loksins byrjað af alvöru!!
Liðið: Gugga, Ásta, Pála, Fríða, Sif (Linda 85.), Guðný (Hallbera 71.), Kata, Vanja, Dóra María, Rakel (Nína 27.) og Margrét Lára

Í dag er okkar fyrsti leikur í mótinu sem allir hafa beðið eftir! Íslandsmótið er að byrja!! Fyrsti leikur okkar verður á Valbjarnarvelli við Stjörnuna í dag, 21.maí kl.19.15. Á sama tíma er einnig Keflavík - Þór/KA og Fjölnir - Fylkir.
Hér er mótið í heild: http://ksi.is/mot/motalisti/urslit-stada/?MotNumer=14844

Sigurður Ragnar Eyjólfsson, landsliðsþjálfari, hefur tilkynnt 18 manna hóp er mætir Englandi í vináttulandsleik ytra 17. maí nk. Leikurinn fer fram á heimavelli Southend United, Roots Hall.
Leikurinn er lokaundirbúningur fyrir fyrsta leik liðsins í undankeppni fyrir EM 2009 en leikið verður við Grikki ytra 31. maí.

Við eigum alls 8 leikmenn í þessum hóp: Kata, Margrét Lára, Dóra María, Ásta, Rakel, Guðný, Gugga og Sif - til hamingju allar! Hér er hópurinn í heild sinni: http://ksi.is/media/landslid/akvenna/A_kvenna_England_mai_2007.pdf

ÁFRAM ÍSLAND!

• Ljósmyndafyrirsætan?



• Vinsælasta stúlkan?



• Flottasta síðan?



• Myspacestúlkan 2007 ?

Í kvöld sigruðum við KR í úrslitaleik Lengjubikars kvenna með tveimur mörkum gegn einu. Við byrjuðum leikinn að miklum krafti og fengum strax gott færi á 2.mínútu en skutum framhjá af markteig. Fyrsta mark leiksins kom á 25.mínútu og var það einkar glæsilegt. Sif átti frábæra sendingu beint á kollinn á Margréti Láru sem skoraði með frábærum SKALLA nánast uppí markvinkilinn og staðan orðin 1-0 við mikinn fögnuð viðstaddra. KR ingar komust síðan betur inní leikinn og fengu þónokkur færi sem þær náðu þó ekki að nýta og staðan var því 1-0 þegar flautað var til hálfleiks. Við byrjuðum seinni hálfleikinn að krafti og áttum þónokkur færi en mjög efnilegur markvörður KR inga sá við okkur í nokkur skipti. Annað mark leiksins kom síðan eftir mjög hratt og gott spil. Á 57.mínútu leiksins fengum við góða skyndisókn, Gugga greip boltann og sendi strax á Kötu sem átti frábæra sendingu inn fyrir vörnina á Margréti og þær Margrét og Nína voru báðar komnar í gegn, Margrét renndi boltanum á Nínu sem skoraði síðan og staðan orðin 2-0. Mjög vel útfærð skyndisókn! Eftir þetta opnaðist leikurinn tölvuvert og bæði lið fengu nokkur góð færi en náðu þó ekki að nýta þau, ber þá hæst þegar Sif Atladóttir átti þrumuskot í slánna eftir hornspyrnu. Á 75.mínútu náði KR að minnka muninn í 2-1 þegar Fjóla átti góða sendingu fyrir markið á Ólínu G. Viðarsdóttir sem skoraði með viðstöðulausu skoti í hornið. Nær komst KR ekki þrátt fyrir nokkrar góðar marktilraunir. Við fengum líka tvö góð færi í lok leiksins og skaut Margrét því miður framhjá í einu þeirra þegar hún var komin ein í gegn og í hitt skiptið náði markvörður KR að verja vel. Mikill taugatitringur var inná vellinum síðustu mínúturnar og náðum við illa að halda boltanum og fórum alltof mikið í háloftaspyrnur. Þrátt fyrir það náðum við að halda fengnum hlut og mjög sætur sigur var í höfn. Eftir leikinn fengum við þennan stórmyndarlega bikar og væna ávísun í verðlaun. Það er erfitt að taka ákveðna leikmenn út og má segja að liðsheildin hafi klárlega unnið í kvöld.
Næsti leikur er “meistarar, meistarana” við Breiðablik á Miðvikudagskvöld, meira um það síðar...
Liðið: Gugga, Pála, Ásta, Fríða, Guðný, Sif, Kata (Linda), Vanja (Hallbera), Nína, Rakel (Andrea) og Margrét Lára