FC Valur Woman

Í kvöld spiluðum við á móti ÍR í landsbankadeildinni og gjörsigruðum þær á heimavelli 10-0. Aðstæður voru nokkuð erfiðar í byrjun leiks en það var grenjandi rigning á holóttum blautum vellinum. Við byrjuðum leikinn alls ekki nógu vel og spiluðum hreinlega illa í fyrri hálfleik. Þrátt fyrir það náðum við að skora á 38.mínútu þegar Dóra María gaf á Margréti Lári sem var felld inní vítateig og umsvifalaust var dæmd vítaspyrna. Margrét Lára tók spyrnuna sjálf og skoraði örugglega. Einungis þremur mínútum síðar var Dóra María með boltann á miðjunni og lagði upp mark fyrir Margréti þegar hún átti stórkostlega sendingu yfir vörnina eftir að hafa tekið boltann á kassann og Margrét kláraði færið frábærlega með vinstri í vinstra hornið og staðan því orðin 2-0 eins og hún var í hálfleik. Beta tók tryllingin í hálfleik enda vorum við flestar að spila virkilega illa að kannski Dóru Maríu undanskildri. Seinni hálfleikur var síðan gjörsamlega allt annar, leikmenn greinilega vöknuðu eftir hálfleiksræðuna. Á 52. mínútu skoraði Vanja með skalla eftir að Margrét komst uppað endalínu og lagði boltann fyrir beint á kollinn á Vönju og staðan orðin 3-0. Margrét Lára skoraði síðan mark beint úr hornspyrnu frá hægri (með hægri) á 58.mínútu sem er hreint ótrúlegt hjá stelpunni! Uppúr þessu kom hreint ótrúlegur kafli hjá okkur en við skoruðum hvorki meira né minna en 5 mörk á tæplega 10.mín kafla! Á sömu mínútu (58.) gerði Beta fyrstu skiptinguna þegar hún tók Rakeli Loga útaf fyrir Guðný sem er öll að jafna sig eftir U19 törnina. Á 60.mínútu var brotið á Kötu innan teigs og vítaspyrna var dæmd. Vítaskyttan okkar Margrét Lára fór í annað sinn í leiknum á vítapunktinn og skoraði aftur örugglega. Guðný var ekki búin að vera lengi inná þegar hún náði að setja mark sitt á leikinn en hún skoraði tvö mörk á tveimur mínútum, það fyrra eftir sendingu frá Margréti og það seinna eftir undirbúning Vönju. Dóra María var næst til að komast á markalistann á 67.mínútu þegar hún skoraði úr teignum eftir stórglæsilega “kassa” sendingu frá Margréti og staðan því orðin 8-0 og enn rúmlega 20.mínútur eftir af leiknum. Á 72.mínútu komst Margrét í fínt færi og lyfti boltanum snyrtilega yfir Mist, markvörð ÍR-inga og skoraði þar með sitt fimmta mark. Margrét var ekki hætt því á 85.mínútu skoraði hún eftir stórskotahríð frá okkur á markið sem þær náðu að verjast á marklínu 3-4 sinnum en boltinn datt til hennar og setti hún hann pent í markið og tíunda og síðasta mark leiksins staðreynd!
Margrét skoraði 6 mörk í leiknum sem eru hreint ótrúlegar tölur, 2 víti, eitt beint úr horni og þrjú úr venjulegum leik! Ótrúlegt! Dóra María var hreint frábær í leiknum og var ein af fáum sem spilaði vel allan leikinn:) Vörnin spilaði virkilega vel í seinni hálfleik en þá náði ÍR ekki að skapa sér neitt opið færi og fór Pála þar fremst í flokki en hún átti virkilega góðan leik sem miðvörður í kvöld. Guðný átti frábæra innnkomu og skoraði nánast strax 2 mörk. Annars stóðu allir sig mjög vel í seinni hálfleik og erfitt að taka ákveðna leikmenn út. Frábær 10-0 sigur, tíu góð mörk og clean sheet, ekki hægt að fara fram á meira!
Liðið: Gugga, Pála, Fríða, Ásta(Linda 67.) Hallbera(Dagný 67.), Kata, Dóra María, Vanja, Rakel (Guðný 58.), Nína og Margrét Lára

Í kvöld skelltum við okkur til heimabæjar Ástu Árna, Akureyrar (bærinn þar sem Ásta bókstaflega þekkir alla) og spiluðum á frábærum Akureyrarvelli en völlurinn var bara "teppi" eins og maður segir á fótboltamáli. Mikil stemning var í hópnum sem náði hámarki þegar Dóra María flaug á hausinn þegar leikmenn voru að ganga inná völlinn í upphafi leiks. Þegar leikurinn byrjaði síðan vorum við gríðarlega einbeittar og áttum leikinn frá upphafi til enda. Fyrstu mínúturnar voru algjörlega okkar þó við næðum ekki að skora strax en Þór/KA getur þakkað góðum markverði sínum sem hélt þeim lengi vel inni í leiknum. Fyrsta mark leiksins kom á 28.mínútu þegar brotið var á okkur á miðjunni, Margrét var fljót að átta sig og átti frábæra sendingu inní teiginn þar sem Katrín Jónsdóttir fyrirliði stangaði boltann inn og staðan orðin 1-0. Virkilega flott mark. Annað mark leiksins kom eftir hornspyrnu, aftur var það eftir góða spyrnu Margrétar sem Kata kláraði af miklu harðfylgi á 40.mínútu. Staðan var 2-0 þegar leikmenn gengu til búningsherbergja. Það var aðeins annar andi í klefanum í þessum hálfleik en í síðasta leik sem við spiluðum enda vorum við að spila hreint frábærlega á köflum og náðum að gegnumspila þéttskipaða vörn Þórs/KA. Við byrjuðum seinni hálfleik að sama krafti og skoruðum þriðja mark leiksins strax á 48.mínútu og var það einkar vel að verki staðið.
Dóra María og Margrét léku þríhyrninga upp völlinn út að endalínu og Dóra renndi honum út á Margréti sem kláraði færið mjög vel og staðan orðin 3-0 og leikurinn algjörlega í okkar höndum.
Á 59.mínútu gerði Beta tvöfalda skiptingu þegar hún tók Sif og Thelmu útaf fyrir Rakeli Loga og Lindu Rós en þær áttu báðar mjög góðar innkomur.
Fjórða mark leiksins kom eftir virkilega gott spil hjá okkur á 64.mínútu.
Fríða átti frábæra sendingu yfir vörnina á Vönju sem komst framhjá bakverðinum og lagði hann fyrir markið á Margréti sem kláraði færið örugglega. Við héldum áfram að spila vel og skapa okkur mörg færi sem við hefðum þó getað nýtt betur en það sem er virkilega jákvætt er að við náðum upp frábæru miðjuspili og mjög fáar langar sendingar og háloftaspyrnur litu dagsins ljós.
Á 77.mínútu var Vanja tekin útaf fyrir Báru sem kom inn af mikilli grimmd og vann ótrúlega mikið af boltum með ákveðni sinni.
Nína Ósk skoraði síðan síðasta mark okkar á lokamínútunum eftir mikið harðfylgi í teignum og lokatölur urðu því 5-0 eftir frábæran leik.
Kata var frábær í leiknum og fór fyrir liðinu eins og sönnum fyrirliða sæmir. Síðan má eiginlega segja að allir leikmenn liðsins hafi verið “vel inní leiknum” og kannski klisja að segja að allir hafi staðið sig mjög vel en þannig var það nú samt:) Margrét skoraði tvö góð mörk auk þess sem hún lagði upp mörk og skapaði færi fyrir félaga sína. Dóra María var arkitektinn af ófáum uppspilum sem enduðu yfirleitt alltaf með góðu færi eða marki. Vörnin steig varla feilspor en Þór/KA skapaði sér nánast engin opin marktækifæri. Thelma Björk byrjaði inná í sínum fyrsta leik á Íslandsmóti og stóð sig með sóma.
Liðið í kvöld: Gugga, Ásta, Fríða, Hallbera, Sif (Linda 59.) Thelma (Rakel 59.), Kata, Dóra María, Vanja (Bára 77.), Nína og Margrét.

p.s þess vegna er skylda að mæta í staðinn á næsta heimaleik;)

Aðrir leikir sem fara fram í deildinni á sama tíma eru: Stjarnan - ÍR, KR - Keflavík og Fylkir - Breiðablik.

Heyrst hefur.....
Að Kata hafi lent í hremmingum í miðbænum um helgina,
Að Berry hafi verið að skemmta sér með familíunni en áttaði sig á því þegar langt var liðið á kvöldið að hún var að skemmta sér með StjörnuliðinuJ
Að Margrét Lára eigi tvífara í enska landsliðinu...
Að Dóra María hafi verið krýnd fegurðardrottning fótboltans við hátíðlega athöfn.
Að Guðný sé með listaverk á kálfanum eftir sjúkraþjálfara U19
Að Anna G. og Orri séu að stinga saman nefjum en stúlkan þykir einstaklega áhugasöm um sporthús-strakana.
Að Vanja sé í rauðum og grænum peysum til skiptis
Að stórir rauðir kassar séu á öllum keppnistreyjunum okkar, sama þótt að treyjan sé ekki rauð, sami stimpill á allar treyjur takk fyrir!
Að það þurfi að vökva grasið..
Og þrífa klefann...
Að Ása hafi verið að eignast nýjan pick-up trukk..
Að Beta ætli að fá sér gjallarhorn til að öskra á okkur á æfingum..
Að Rakel Loga sé orðin ofvirkur einkaþjálfari..
Að Re-bounderinn sé kominn uppá gras og sé að gera góða hluti.
Að við spilum á einhverjum Vodafone sparkvelli næsta ár?
Að Margrét Lára hafi brotið á Aliciu í KR leiknum þegar við vildum fá víti..
Að Beta sé heppin að vera ekki látin fjúka eins og Kalli Stjörnuþjálfari eftir tapið í bikarnum..
Að það vanti brúna tígla í nammipokann í leikjum...(og líka lakkrísbombur)
Að það hafi górillur mætt í afmælið til Kötu..
Að það séu að myndast ástarsambönd innan kvennaráðsins..
Að það sé erfitt að bera fram nafnið “Bentína”
Að æfingagrasið sé holóttara en Valbjarnarvöllur
Að betra liðið sigri ekki alltaf..
Að LaserTag sé nýjasta æðið..
Að það sé komin tími á að Fríða haldi innflutningspartý
Að það sé að koma þreföld afmælisveisla...SA,DML,MLV..
Að það sé aftur komið undirbúningstímabil..

Síðan er auðvitað margt fleira sem má endilega bæta við í kommentakerfinu...

Fleiri leikir sem fara fram í VISA bikarnum á sama tíma eru: Þór/KA - KR, Stjarnan - Fjölnir og Afturelding - Keflavík. Hér er mótið í heild: http://ksi.is/mot/motalisti/urslit-stada/?MotNumer=14266

Fyrir leikinn vorum við jafnar að KR á stigum og var því fyrirfram talað um þetta sem einn af “úrslitaleikjum” sumarsins og mátti því búast við virkilega spennandi viðureign tveggja góðra liða. KR-ingarnir byrjuðu leikinn betur en við og fengu dauðafæri strax á fyrstu mínútu sem var varið. KR stúlkur komust síðan yfir á 14.mínútu og var þar af verki Hrefna Jóhannsdóttir sem þrumaði boltanum í markið eftir mikinn klaufagang hjá okkur en við höfðum þónokkur tækifæri til að koma boltanum í burtu og staðan því orðin 1-0 fyrir KR. KR-ingar efldust enn frekar við þetta en smátt og smátt náðum við að komast betur inní leikinn. Við sköpuðum okkur eitt algjört dauðafæri þegar Margrét skaut yfir af markteig eftir sendingu frá Dóru Maríu. Um miðjan fyrri hálfleikinn vildum við fá vítaspyrnu þar sem Alicia leikmaður KR braut illa á Margréti og er eiginlega ótrúlegt að vítaspyrna hafi ekki verið dæmd. Það sem eftir lifði af fyrri hálfleik var mikil barátta milli liðana og bæði lið fengu svosem færi til að skora en hvorugu liði tókst það og staðan því 1-0 fyrir KR í hálfleik. Við gerðum eina breytingu í hálfleik en Pála sem var á gulu spjaldi fór útaf fyrir Nínu sem náði að hressa vel uppá okkar leik. Við komum mun ákveðnari til seinni hálfleiks en KR fékk samt fínt færi efir hornspyrnu sem fríða varði á marklínu. Við byrjuðum að vinna miklu fleiri skallabolta og návígi en KR ingar höfðu klárlega yfirhöndina í því í fyrri hálfleik. Við sóttum nokkuð stíft á KR ingana en vorum alltof oft veiddar í rangstöðugildruna og ávallt flaggaði línuvörðurinn. Á 56. mínútu kom Hallbera inná fyrir Rakeli sem er búin að vera meidd undanfarið. Á 61.mínútu fengum við síðan hornspyrnu sem Dóra María tók stutt á Margréti Láru sem gerði sér lítið fyrir og þrumaði á nærstöngina og skoraði gríðarlega mikilvægt mark. Eftir þetta var leikurinn í járnum allt fram til loka og má segja að bæði lið hefðu auðveldlega getið stolið sigrinum. Við fengum þó mun opnari færi og komst Dóra María í eitt slíkt rétt fyrir leikslok, komst alein í gegn en lét verja frá sér í horn. Umdeilt atvik gerðist síðan í uppbótartíma leiksins en Dóra María komst aftur ein í gegn og var klippt niður af markverði KR inga sem fékk aðeins að lýta gula spjaldið, en samkvæmt reglum á þetta að vera rautt spjald. Margrét tók spyrnuna beint í veginn sem var komin ansi langt á móti spyrnunni. Við fengum því að taka spyrnuna aftur og í þetta sinn skaut Vanja í vegginn. Eftir það flautaði dómarinn til leiksloka og niðurstaðan 1-1. Svona heilt yfir má segja að jafntefli sé sanngjörn niðurstaða þó að við séum sársvekktar að hafa ekki klárað leikinn því við fengum klárlega færi til þess. Eftir leikinn erum við því með 19 stig, eins og KR en erum á toppnum vegna aðeins betri markatölu. Það er erfitt að taka leikmann úr okkar liði sem stóð uppúr, Guðný skilaði sínu ágætlega, og Nína hressti uppá liðið með sinni innkomu. Vörnin átti því miður ekki alveg nógu góðan dag og sóknarlínan var alltof oft dæmd rangstæð. Við fórum í smá “kick and run” leik og hefðum mátt vera aðeins rólegri á boltann og köttuðum miðjuna svolítið útur leiknum á tíma. Í KR var Katrín Ómars best, auk þess sem Olga, Alicia og Íris markvörður KR inga stóðu sig vel.

Liðið: Gugga, Ásta, Guðný, Fríða, Pála (Nína 46.) Sif, Rakel (Hallbera 56.) Vanja, Kata, Dóra María og Margrét

Á morgun, föstudaginn 6.júlí fer fram stórleikur á milli Vals og KR á Valbjarnarvelli klukkan 19.15. KR er eins og við á toppnum og hefur sigrað alla sína leiki til þessa og er því ekki hægt að búast við neinu nema hörkuleik annað kvöld. Við viljum hvetja alla til að koma á leikinn og sjá þennan stórleik og styðja okkur til sigurs!! Á sama tíma og okkar leikur fer fram er einnig Keflavík - Fylkir. Hér er mótið í heild sinni: http://ksi.is/mot/motalisti/urslit-stada/?MotNumer=14844

Næsti leikur okkar í Landsbankadeild kvenna er á móti Fylki í Árbænum og hefst hann á morgun, mánudaginn 2.júlí kl. 19.15 og fer fram á Fylkisvelli. Fylkir er sem stendur í 7.sæti deildarinnar og hefur að skipa ungu og efnilegu liði. Við viljum hvetja alla til að mæta á völlinn og styðja okkur til sigurs í þessum leik! ÁFRAM VALUR!!!!